A misa de San Antón en Dumia: tradición e encontro

Como é tradición, este ano volvemos celebrar en Dumia, o noso pequeno pobo de montaña, a misa en honra a San Antón, unha das citas máis esperadas do calendario do lugar.

A celebración tivo lugar na pequena capela do pobo, un espazo moi especial para todos nós. Nela atópase un fermoso altar tallado en madeira, onde se alberga a imaxe de San Antón e da Virxe das Neves, que presiden a capela e acompañan cada celebración coa súa presenza serena.

Á misa acudimos veciños de Dumia e dos pobos da contorna, reuníndonos nesta ocasión arredor de medio cento de persoas. Ademais do carácter relixioso do acto, a misa converteuse unha vez máis nunha escusa perfecta para xuntarnos, conversar e compartir un anaco entre veciños, reforzando os lazos que nos unen como comunidade.

Este ano, a misa foi ofrecida por Teresa de Villaxán e estivo oficiada, como é de costume, polo noso párroco, Ramón Gutiérrez, a quen lle agradecemos a súa proximidade e dedicación.

Queremos deixar constancia deste día tan especial compartindo algunhas fotografías dos asistentes, así como da capela, do altar e da imaxe de San Antón, lembranzas dunha xornada marcada pola tradición, a fe e a convivencia.